საქართველოს ფეხბურთის ფედერაციის პრეზიდენტმა, ლევან კობიაშვილმა „რუსთავი 2“-ის ეთერში, გადაცემა „სპორტის საათში“ სტუმრობისას განაცხადა, რომ ეროვნული ნაკრების მთავარ მწვრთნელს საქართველოში ცხოვრება სურს.
კობიაშვილი განმარტავს, რომ ფრანგ სპეციალისტს ქართველი ხალხის ახლოს გაცნობა და მენტალიტეტის შესწავლა უნდა, რაც სამომავლო გადაწყვეტილებების მიღებაში მნიშვნელოვან როლს ითამაშებს.
„მისი სურვილია საქართველოში და თბილისში რაც შეიძლება დიდხანს იყოს. ეს იყო მისი ინიციატივა და რა თქმა უნდა დასაფასებელია. მას უნდა რომ აქ იცხოვროს, ურთიერთობა ჰქონდეს ადამიანებთან, თუნდაც ქუჩაში. იცოდეს ვინ ვართ, რა მენტალიტეტი გვაქვს, როგორი ხედვა გვაქვს, როგორ ვაზროვნებთ და ა.შ. ეს ძალიან დასაფასებელია. მას ნამდვილად უნდა რომ კომუნიკაციის პრობლემა არ ჰქონდეს, იქნება ეს მედიასთან თუ ნებისმიერ ადამიანთან. ამის პრობლემა მას არ აქვს“, – განაცხადა კობიაშვილმა.
