დასრულდა „ევრობასკეტ 2022“-ის შესარჩევი ეტაპი, რომელშიც საქართველოს ნაკრები კონკურსგარეშე მონაწილეობდა და ჯგუფში მეორე ადგილი დაიკავა. სამწუხაროდ, თბილისში გამართულ „ბაბლზე“ ილიას ზუროსის გუნდმა ორივე მატჩი წააგო, თუმცა ამისგან ტრაგედიის შექმნა ნამდვილად არ შეიძლება, რადგან ჩვენი ნაკრები შესუსტებული და გადახალისებული შემადგენლობით თამაშობდა.
უახლოეს ხანებში კი ევრობასკეტის წილისყრა გაიმართება და გაირკვევა ის გუნდები, რომლებიც თბილისში შეიკრიბებიან. შეგახსენებთ, საქართველო ერთ-ერთი მასპინძელი ქვეყანაა და თბილისის ახალი სპორტის სასახლეც E ჯგუფის მატჩებს უმასპინძლებს.
აქვე გეტყვით იმასაც, რომ ყველა მასპინძელ ქვეყანას თავიანთ ქვეჯგუფში ერთი გუნდის არჩევის უფლება ეძლევა. საქართველოს კალათბურთის ფედერაციის ვიცე-პრეზიდენტი ვლადიმერ ბოისა ამ საკითხთან დაკავშირებით საინტერესო კომენტარს აკეთებს.
„სერიოზული დაფიქრება გვმართებს, ვიდრე გადაწყვეტილებას მივიღებთ. არჩევანი ორ ვარიანტს შორის უნდა გავაკეთოთ. ავირჩიოთ შედარებით სუსტი გუნდი, რომელთანაც მოგების დიდი შანსი გვექნება ან ქვეყანა, რომელიც დიდ თანხას დახარჯავს აქ. მოკლედ, გათვლა წმინდა სპორტულ კუთხეზე ან ეკონომიკურ მოგებაზე უნდა შევაჯეროთ.
ვფიქრობთ ლიეტუვას არჩევაზე, რადგან მათთან ევრობასკეტზე ერთხელ უკვე მოგებული გვაქვს და რატომ არ შეიძლება იგივე კიდევ გავიმეოროთ? ლიეტუვადან ძალიან ბევრი გულშემატკივარი ჩამოვა, მაგრამ აქ არის მედლის მეორე მხარეც. მხოლოდ შენ სურვილზე არ არის დამოკიდებული, არჩეული მეტოქეც უნდა დაგთანხმდეს.
სავარაუდოდ ლიეტუვას თბილისში ჩამოსვლა არ ენდომება და უპირატესობას გერმანიას მიანიჭებს, რადგან იქ შედარებით მარტივი გასეირნება ელის. მოკლედ, გადაწყვეტილება 12 მარტამდე უნდა მივიღოთ“ – ამბობს ვლადიმერ ბოისა.
